Friday, July 15, 2005

ضباط و جنود من أجل التفعيص




يبدو أن االداخلية أردت هي الأخرى أن تكون لها بصمتها
في أفكار و إبداعات التغيير و التي تحدث في مصر و
لكن بالطبع فإن الفرق شاسعا بين حركات التغيير المصرية الجميلة التي نريدها
أن تزداد و تتطور و تتوحد
و حركات الأمن و الشرطة المصرية "القرعة " المفضوحة التي تتسم بالغباوة لأنها تخرج من
عقول مظلمة مسجونه وغير مبدعة على الإطلاق و لذلك كانت حركتهم التي سأطلق عليها
ضباط و جنود من أجل التفعيص
و الحركة الشيطانية تستحق التأمل أولا لانها جديدة ثانيا لانها غريبة
و ملخصها أن يتجمع أكبر عدد من عساكر الأمن المركزي حول المتظاهرين في دائرة ثم تبدا عملية الفعص
و الكبس و قد يكون المتظاهرون جميعا في دائرة واحدة و قد يكونوا في عدة دوائر تتعرض للتفعيص في وقت واحد
و المتابع للمظاهرات قد يلاحظ أن
جنود و ضباط من أجل التفعيص قد بدأت نشاطها و لكن على خفيف يوم الاربعاء الأسود و لكن بدت الحركة
ملحوظة في المظاهرات الأخيرة و قد رصدتها الوعي المصري وبوضوح في المظاهرة الأخيرة بعابدين
و حركة التفعيص ليس لها أهداف واضحة مثل باقي الحركات إلا أن تأثيرها يظهرفورا من حالات الإغماء
التي تقع بين صفوف المتظاهرين و للمعجزة العسكر أيضا
و للحق هو تكتيك يشهد بخلطة الخبث و القذارة المتفتقه عن ذهن رجال الأمن المصري والذي ليس بجديد عليهم إذ أن التفعيص
قد يخفي في طياته الكثير من الإنتهاكات الأخرى فقد يكون مصحوبا بقفا أو صفعة أو شلوت و يظل "تفعيص"
أو تحرش بإمرأة مثلا و يظل "تفعيص" و أمام النائب العام تكون فرصة للهروب و إنكار أي تحرش او إعتداء
فيقولون " مفيش ضرب ولا إعتداءات ده كل الحكاية كان تفعيص يا باشا".

12 comments:

Alaa said...

للأسف مش النائب العام فقط الاعلام كمان بيتعامل مع التفعيص على انه حاجة سلمية و تسمع كلام عن ضبط النفس و عدم حدوث مشاحنات و باقي الهبل ده

و واضح أن موضوع التفعيص مش هينفضح بجد الا لما حد يموت، بما أن في مجتمعنا الجميل من كتر الذل بقي الضرب علي القفي مش عنف و وجود أعداد خرافية من جنود مدججة بالسلاح مش ارهاب و الكلام الجنسي البذيئ مش تحرش، و تقطيع الملابس و التقفيش مش هتك عرض

لازم المعارض تحصله عاهة عشان يبقي أسمه انضرب، ولازم حد يموت عشان يبقي ارهاب و لازم الواحدة تممسك عشان يبقي تحرش ولازم تت..(ولا بلاش) عشان يبقى هتك عرض، وللأسف الكلام ده بنسمعه من ناس المفروض أنهم مننا

الأدهى بنتهم أن أحنا اللي بدأنا العنف عشان رفضنا نتفعص و زقينا، يعني معيار المتظاهر للعنف غير معيار الأمن المركزي

على العموم لحد دلوقتي بنقدر نغلبهم و نبوظ الفعصة، معرفش ده قوة مننا ولا همة لسه مرخيين ايديهم ولا زي مالعسكري اللي من بني سويف قاللي ده عشان أحنا بناكل لحمة (ماردتش أصححله مكرونة قوم عند قوم لحمة حد عارف هو بياكل ايه).

Moushira said...

علاء عنده حق .الظاهر لازم حد يموت علشان يبقى إرهاب.. هما إذا كانوا عساكر من أجل التفعيص يبقى الضرب مش"كفاية" !.. حد يعرف مين العسكرى إللى بطل يضرب و قال لأ..؟؟,,, و راح الضباط ضربوه..الراجل دا لازم نقف معاه..

Mr-Biboooo said...

على فكرة موضوع التفعيص ده سمة مصرية و ماركة مسجلة للمصريين و الحكومة المصريه اللى بتشجعه فالحكومة لم ترضى بان يتوقف دور التفعيص فى طوابير العيش امام الافران ولا فى المواصلات و الاتوبيسات ولا للاولاد على سلالم المدارس الحكومية و لا للعربيات فى شوارع القاهرة.......................
كمان خلته فى المظاهرات عشان يتحول المواطن المصرى لاشهر مفعوص فى العالم

wa7d_masry said...

في سوال هيفضل على لساني وياريت يكون ديل كل مقال يكتبه اي واحد .
مادا جرى في تحقيقات يوم الأستفتاء يا سيادة النائب العام ؟

Taher Amin said...

مش اول مرة
وثانيا انتم بتضحكم على نفسكم ما حصلت مظاهرات كتيرة قبل كدة وناس كتيرة ماتت ومش من التفعيص من الضرب والرصاص كمان وكله عارف كده كويس
بس احنا عارفين ان احنا مالناش عند الغجر دول دية
اخرهم معاك تلات تلاف جنيه تعويض وخلصت
وبمناسبة التعويض انا قريب لى فى دولة اجنبية مات له الكلب الى بيحرس بيته اتحكمله بتعويض ما يساوى عشرين الف لحلوح
يعنى هم خلو الكلب برة يساوى 6 انفار ومعاهم عيل صغير كمان
اه بالمناسبة يا جماعة انا لسه اعرف موقع واحدة مصرية وموقع الوعلا المصرى الشهر الى فات
وانا والله عمر ما حد بعتلى فيروس اجى اتشك على الميل امبارح الاقى اكتر من 14 رسالة وال 14 من اشخاص مختلفين وال 14 فيهم نفس الفيروس والكلام ده من تانى يوم دخلت على الوعى المصرى بس بصراحة انا لسه مكتشفه دلوقتى
بس غبى اوى اللى بعت لى نفس الفيروس فى 14 رسالة ده
لا لا لا مش قصدى اللى فى بالكم

wa7d_masry said...

عقبالنا يا رب
علي عبدالله صالح مش هيرشح نفسه تاني ( عمل خير )
على فكرة في حركة زي كفاية في اليمن اسمها "أرحلوا" ( كفاية بالفصحي )

له ابن قائد الحرس الجمهوري وقائد القوات الخاصة بس يارب ميطلعش بتاع حركات يكون بيفرش لأبنه علشان يجي مكانه

منتظرين قراراتك التاريخية يوم السبت
يا بتاع القرارات التاريخية .

مريم said...

عن انسحاب الاحزاب من"الانتخابات" القادمة
أعلنت قناة الجزيرة انسحاب حزبي التجمع و الناصري من "الانتخابات"، و قبلهما كانت كفاية قد أعلنت انسحابها هي الأخرى. و أنا بصراحة مش فاهمة المنطق ده. أعلنت كفاية في أسباب انسحابها ان ما بني على باطل فهو باطل و لأن التعديل الدستوري الأخير باطل فانه لا وجود لانتخابات من الأصل و انها هتكون ديكور سياسي فقط.
أحترم هذا الرأي و أدرك تماما اللعبة القذرة اللي اتلعبت في تمثيلية التعديل ، و لكن سؤالي هو ما عيب اللعب على جميع الجبهات و الاستفادة من أخطاء الماضي في ظروفنا دي؟ بمعني انه عندما قاطعت الأحزاب المعارضة الاستفتاء على التعديل نشرت جريدة- لا أذكر اسمها الان للأسف- رأي فرنسي في هذا الموضوع مفاده انه لا يفهم لماذا قاطعت الأحزاب الاستفتاء و ان المعارضة الحقة لازم تنزل الشارع و ما تسيبوش فاضي للحكومة و تفضل في موقف سلبي...ا
طبعا غاب عن هذا الرأي الكثير من وقائع هذا الاستفتاء و أهمها أن السؤال الذي كتب في البطاقة كان خادعا- وهو ما دفع الأحزاب للمقاطعة في نظري- لأنه ممكن أكون موافقة على مبدأتعديل الدستور لكن رافضة الصيغة المقترحة من مجلس شعب الحكومة وماقدرش أوضح ده في البطاقة. و مع ذلك فالرأي الفرنسي يطرح رؤية مهمة جد ا لازم نستفيد منها و هي رؤية الدول الغربية للمعارضة و طريقة عملها خاصة اننا يهمنا الضغط الخارجي في الحالة دي-و مش لازم ضغط أمريكا أقصد هنا الضغط الأوروبي-لأن التجربة أثبتت ان الحكومة ما بتسمعش الشعب ولا بتحترمه انما بتخاف أوي على صورتها بره.
لو الأحزاب فعلا عايزة تنسحب ، تنسحب بس تلعب سياسة صح و تفضح الحكومة الأول. أتصور أن الأحزاب و الحركات المعارضة في الفترة الجاية تركز على مرشح واحد محترم ببرنامج شامل متفق عليه مع خلق حالة من الزخم في الشارع مع اقتراب الانتخابات، مظاهرات.. بيانات..فضائيات، يعني كل وسائل الضغط الممكنة للمطالبة باشراف قضائي كامل على الانتخابات مع الاستعانة باشراف أوروبي ان أمكن عشان نسد على الحكومة كل فرص التزوير الممكنة... و يفضل الضغط شغال و يكبر يوم بعد يوم لغاية مثلا يوم 5 أو 6 سبتمبر، وقتها لو الحكومة كانت لسه ما ستجابتش للمطالب يعمل مرشح المعارضة مؤتمر صحفي كبير يعلن فيه انسحابه المفاجئ لعدم التزام الحكومة بالضوابط المطلوبة مع تقديم ملف كامل عن تزويرات يوم الاستفتاء عشان العالم ساعتها يفهم مبررات الانسحاب
بالشكل ده الحكومة فعلا هترتبك و تتفضح قدام العالم و الشارع مش هيسكت على نتيجة الاستفتاء الديكور، و لأن وقتها هيكون المرشح قدر يكسب ثقة من العالم أو على الأقل هيكون اتعرف كواجهة للمعارضة، لذلك كلامه و مؤتمره الصحفي و فضحه لتزوير الحكومة في نتائج التعديل هيكون له مصداقية على الفضائيات، مش هتبقى الحكاية أصوات متناثرة من هنا و هناك بتعارض و خلاص... لأ جبهة واحدة قوية ممثلة في شخص و احد
الانسحاب المبكر من دلوقت بيرسل رسالة واحدة بس للعالم اننا فعلا معارضة على الورق بس، معارضة مراهقة ليس في استطاعتها تقديم مرشح واحد ينافس مبارك، معارضة بتسيب الساحة و تجري و قت الجد وو قتها محدش يقدر يلوم الأخ رئيس الوزرا لما يقول اننا "غير ناضجين سياسيا".

wa7d_masry said...

ويا تري ممكن الأحزاب تتفق على شخص واحد
أجمل حاجة في حركة كفاية انها بالرغم من ضمها لعدد كبير من التيارات اللي مش ممكن تتفق بس قدرت تتفق على اساسيات اي واحد بيحب البلد دي مش ممكن يختلف عليها بس علشان تخلي الأحزاب تتفق على واحد التجمع هيقول يبقي رفعت السعيد والغد هيقول ايمن نور و...و...
دول غير كومبارس الدرجة التالتة اللي انتي هتشوفيهم بيمثلوا مثل ناجي الشهابي (زعيم حزب الجيل ) اللي قال الحزب بيرشح حسني قبل التعديل وبعد التعديل اقتضي دوره انه يرشح نفسه قال انا هرشح نفسي وبرضه استفيد بالمليون ونص
للأسف يا مريم مفيش أحزاب معارضة في
مصر
يعني علشان الموقف بتاع الحزب الناصري دلوقتي ان بحترمه
والغد ان مقدرش احكم على ايمن نور بسبب حاجات لازم توضح
اللي خلنا نلتف حول كفاية هي واضح مطالبهم اللي مش هتستفيد منها فئه معينه لكن هيستفيد منها الشعب كله
يمكن يكون الأفضل اختيار مرشح من خارج الأحزاب وبصراحة في ناس محترمه كتير بس يا تري مين هيقف جنبهم ؟؟؟؟
بس تقدري يا مريم تقولي اسم هم هيتفقوا عليه

TawTaw said...

فعلاً يا مريم تحليلك جيد جداً، مقاطعة الاستفتاء كان عمل له ما يبرره بحسابات المكسب والخسارة،أما مقاطعة الانتخابات ستأخذ كثيرا من سخونة القضية، والكلام عن الشرعية له ما يبرره لكن يجب أن يؤخذ فى الاعتبار موازين القوى والقدره على التأثير وحسابات المكسب والخسارة، وعلى من ينادى بالمقاطعة أن يقدم حل بديل وآلية لإحداث التغيير بطريقه سلميه.
واحد مصرى
قضية الاسم مش معضلة لأن كدة كده الى هيجى سيستمر لفترة لا تتجاوز السنتين ويمكن أن يتم الاتفاق بحيث أن كل حزب أو تيار سياسى يكون له ممثلين من الوزراء فى حكومة السنتين وممثلين فى الجمعية التأسيسية التى ستشرف على كتابة دستور جديد على أن يتم أنتخاب باقى الأعضاء وممكن يرئس هذه الجمعيه شخص له تاريخ وليس له انتماء سياسى محدد وأعتقد أن أفضل شخص يقوم بهذا الدور محمد حسنين هيكل لأنة مع خبرته الكبيرة يمتلك رؤية للمستقبل كما أنة أول من نادى بالحاجة الى عقد وطنى جديد ويمكن أن يكون رئيس الوزراء أيضا شخصيه محترمة من خارج الأحزاب ، وبشكل عام فالسياسة هى الوصول الى حلول وسط. معك حق أن الأحزاب ضعيفة ولكن اذا أضيف اليها التيارات مثل الأخوان وكفاية فسيكون لها قدره كبيرة على التأثير.

مريم said...

واحد مصري
الحقيقة ردك علي بانه فعلا مفيش أحزاب معارضة في مصر هو الرد الكابوس اللي كنت خايفة منه خاصة بعد أداء رؤساء الأحزاب امبارح في برنامج "حالة حوار" . للأسف الأحزاب فعلا ضعيفة و دا اللي خلي الناس تلتف حول حركة كفاية بس كفاية لسه ماقدمتش البديل اللي عندها و الالية اللازمة لتحقيقه
بالنسبة للأسماء أنا متفقة مع
tawtaw
ان الأسماء كتير ، المهم فعلا ان يكون فيه نية حقيقية للتحرك و رغبة للتغيير عند الأحزاب عشان تقدر تسمو فوق خلافاتها و تتفق على اسم واحد - و بالفعل الأفضل انه يكون شخصية مستقلة غير منتمية لحزب معين_ و مع ذلك مش عارفة ليه أول ما فكرت في اسم مرشح جيد للرئاسة نط في دماغي اسم حمدي قنديل.
اسم محترم ، واجهة معروفة كويس للناس الغلابة و دا عامل مهم، كمان اذا كان فيه أي اعتراضات عليه لازم يكون في دماغنا انه مش هيفضل زي ما مبارك فضل كده..لأ أي حد هيجي بعد مبارك هييجي عشان يغير الدستور و يرسي قواعد ديمقراطية سليمة لأن الناس مش هتقبل بأقل من كده أول ما يتحقق بس أملهم في ازاحة الحكم الأبدي المؤبد المستمر من 24 سنة
عشان كده الشروط اللازم توافرها في أي مرشح للمرحلة الانتقالية القادمة مش كتير أهم حاجة النزاهة و انه يكون شخصية محترمة لا غبار عليها و انتمائها الفكري المؤيد للتحول الديمقراطي

huda said...

في جمعيات كثير اوي في مصر ومنظمات بتحاول تساعد المعتقليين المفرج عنه علي تخطي مشاكلهم النفسية والجسدية التي خلفها وجودهم لفترة طويلة داخل دائرة جهنم التي هي بمعنى ادق داخل سلطة اي ظابط شرطة ، ولكن الشيئ الذي لم تقوم به اي من هذه المنظمات والتي اعتقد انه بالفعل سوف يكون مفيد هو ان تقوم اي من هذه المنظمات او الهيئات بدراسة خلفيات هؤلاء الوحوش ودراسة سلوكياتهم والاسباب الاجتماعية التي خلقتهم والبيئة التي اتو منها لعلنا نستطيع من خلال هذه الدراسات فهم سلوك انساني تحول فجأة الي سلوك لا يرقى لمستوى الحيواني

sertac cesur said...

uzamax