البقاء ل الله في ضحايا حادثة القطار ,فصل جديد من فصول المأساة التي نعيشها في ظل دولة الإهمال و حكم الفرد , إقالة رئيس هيئة النقل لن يحل المشكلة!!! و الرجل غير مسئول وحدة فحالة هيئة السكك الحديدية و قطاراتها لم تتغير منذ سنوات و تزداد سوء و كل مرة أستقل فيها قطارتنا أتوقع كارثة .
صبرنا يا رب لقد فقدنا في ستة أشهر بين ضحايا العبارة و القطار أكثر مما فقدته لبنان و إسرائيل في الحرب الأخيرة ضحايا الإهمال و السرقة و الفساد
9 comments:
البقية في حياتك يا باشمهندسة وحياتنا كلنا... بالذمة دي بلد عندها دم؟ على رأي بلال فضل أثبتنا تفوقنا على إسرائيل وعلى أعظم جيوش العالم... عدد اللي ماتوا في حرب استمرت لمدة شهر أقل من اللي احنا غرقناهم في ساعة واحدة ولا يضاهى باللي حرقناهم في قطر الصعيد وبرضه في ساعة واحدة ويزيد قليلا عن اللي قتلناهم امبارح في تلات أربع دقايق في حادثة القطر الجديدة...
طبعا ليس الحل في إقالة رئيس هيئة السكك الحديد... بالنسبة لهم الحل في النخصصة قصدي الخصخصة وبيع السكك "الحديد" ومدام الموضوع فيه "حديد" يبقى عز أولى بلحم توره
بالنسبة للحكومة الحادثة دي فرصة أنها تقول للناس كلها أنه السكك الحديد ما لهاش حل غير البيع وإعادة الهيكلة (بتاعتهم زي الإصلاح بتاعهم كدة)...
صدقيني دي بقت حاجة تقرف وتغم النفس (معاكيش قرص زانتاك؟)... مش عارف ليه عندي إحساس أن الواحد في البلد دي قاعد مستني دوره... إزاي البلد دي ناوية تخلص عليه! وش عارف ليه افتكرت دلوقتي رباعية صلاح جاهين اللي بتقول:
الدنيا أودة كبيرة للانتظار
فيها ابن آدم زيه زي الحمار
الهم واحد والملل مشترك
وما فيش حمار بيحاول الانتحار!!
وعجبي!!
طبعا ليه أي حمار يحاول الانتحار إذا كانت الدولة بتقدم لك الحل من غير ما تتعب نفسك... الشيء المحزن أنه ما فيش خيارات... يعني تحبي حضرتك تموتي غرقانة ولا محروقة؟ وعايزة نسبة الحروق كام؟ للأسف غنتي بتاخديها باكيدج كدة من غير تمييز نظام "تيك ات أور ليف ات"... أوففففففففففف بقى الواحد زهق م القرف دا
الضحايا ليهم الله واحنا لينا مين؟؟؟
تعرفي يا باشمهندسة... المسئول الوحيد عن السكك الحديد المتهالكة هو الشخص الوحيد الموجود في الحكم من 30 سنة (ستة نائب رئيس و25 رئيس) بقى طول الزمن دا ما جاتش فرصة يجددوها؟
قبل ما تدينوا السواق المسطول ... اللي تلاقي مش لاقي يكفي عياله سجاير وكُلَّة... حاسبوا الرئيس!! اللي مخلي الشعب مش لاقي حتى يشم كلة... كفاية عليكي كدة... أروح اشم في صوابع رجليا!! لو ما رجعتش بعد أسبوعين يبقى أخدت أوفر دوز!! سلامه عليكوووووا
انا عايز اضيف حاجة بس......الحكومة قدرت الاموال اللي محتاجاها هيئة السكك الحديدية ب8 مليار علشان تقف الحوادث في هذا القطاع....ومن كتر ال8 مليار(بالنسبة لدولة)جزؤها علي خمس سنيين....في حين ان المصروفات البذخية لكبار المسؤلين والوزراء في العام الوحد 10 مليار
أحب أفكرك وأفكر القراء (د إذا كان في قراء) أن العشرة مليار اللي انت بتقول عليها دي كانت بند "نثريات" في ميزانية السنة اللي فاتت يعني هدايا راس السنة في المصالح الحكومية والأجندات والولاعات وكدة يعني!! يا عم عربي افهم (على رأي شعبولا) التمانية مليار اللي هتتصرف على السكك الحديد دي تتصرف ليه عشان الأشكال "الزبالة" أمثالك وأمثالي ما يموتوش؟ طب ودا تفتكر يهز شعرة في راس الحكومة (خليك مؤدب ومشيها راسها)... ما قولتليش صيفت السنة دي في الساحل الشمالي ولا في الجونة زي كل سنة؟
عندك حق...الشعب المصري بقه اقلية...لا زبالة...احنا احسن حاجة نسيبلهم البلد يحكموا نفسهم...لحد مايخلصوا علي بعض...وبعدين نبقي نرجعلها
الموضوع بسيط جداً. مين اللي بيركب القطارات؟ الناس الغلابة. ودول بقى ملهومش ثمن. يعني بالعربي كده: يتحرقوا بمازوت وسخ. لو علية القوم بيركبوا القطارات كان الوضع اختلف وكنتم لقيتم مستوى الأمان والصيانة زي سكة حديد طوكيو كده. الغلابة في مصر حياتهم بائسة وتعيسة والحكومة بتعمل فيهم معروف بإهمالها في إجراءات السلامة في القطارات والعبارات وإلى آخره ... عشان يستريحوا من الغلب اللي هم فيه
انا مش فاهم انتم عايزين ايه
القدرة على التدمير اسهل
و بعدين الى يموت يموت هو حد دارى بحاجة
تصدقى يا واحدة مصرية مش احنا بنتكلم على الفقرا الى ماتوا فى القطرين
تصدقى و تؤمنى بالله فقرا كتير فى مصر من كتر فقرهم ميعرفوش بالحادثة و لا سمعوا عنها
و بحكم شغلى ساعات كتير بحتاج اجيب ناس فواعلية علشان تنضيف و شيل حط و بلاوى سودة
انفار يعنى
سألتهم على موضوع القطر و لا سمعوا عنه
خلينا احنا كده عندنا كمبيوتر و بلوجات و الذى منه و فرحانين بالى بنكتبه و الفقرا و لا حتى داريين بأى حاجة
ربنا يعوض علينا
سياسة تغييب تمام التمام
انا عايز اقول حاجتين....اول حاجة ان اللي خلاني اعمل بلوج لما شوفتك انت وشاهيناز في برنامج المدونون...وبعدين لما سمعت باللي حصلك وكمان لما خلصت سنة تانية ثانوي(ادعولي عشان تالتة)قلت لازم اعمل بلوج....بس فعلا البلوج ده حاجة غير مؤثرة في مجتمع دولة نامية(او نايمة)لان مش كل الناس عندهم كومبيوتر......وكمان ناس كتير ماتعرفش يعني ايه بلوجينج...واللي بيعرف بيعمل...يعني كل اللي بيقرولنا مننا....مقتنين بقضايانا وفاهمين اللي بيحصل...يعني احنا فعلا لازم نعمل حاجة تأثر في الشارع مع البلوجينج
Post a Comment