Saturday, February 11, 2006

من كتر قهرتي


أنا من كتر قهرتي عجزت عن الكتابة و شل تفكيري لماذا يموت كل هؤلاء الأبرياء ليه ؟
لماذا تكتسي مصر كلها بالأحمر عشان الكورة و يهتفوا بنحب مصر و دماء الضحايا لم تبرد بعد في مياه البحر الأحمر ثم نرى رئيسنا المنتفخ اللي مش عرفة أنتفخ من إيه من الأكل ولا حقن الكورتيزون و على وجهة الشاحب إبتسامة مرض يسلم الكأس لفريق الكرة هو إحنا للدرجة دي مجانين؟ وباردين معندناش دم؟
لم أتمكن من الفرحة و كنت متألمة أفكر في هؤلاء الذين ظلوا يستنجدون بالساعات في البحر دون أن يغيثهم أحد
بسبب الإهمال و اللا مبالاه و الفهلوة و "معلش" و قلة الضميرو السلبية كل تلك المكونات المتغلغلة في الشخصية المصرية و التي تسببت في مقتل الأبرياء و فوز رئيسنا المنتفخ و وجوده لحد دلوقتي أصلا , أفكر في سمك القرش الذي أكل مصريين مثلي و مثلكم أفكر فيمن ظلوا يصارعون الموت في مياه البحر المجمده و كم منهم قتلهم الخوف و قتلهم البرد يا إلهي ألن نفيق أبدا و ما ذا بعد تلك المأساة
بدأ كل طرف مسئول يتهرب و يتنصل و يلزقها للأخر كالعادة الله يخرب بيتهم
نفس المشهد تكرر بعد حادثة قطار الصعيد منذ بضعة سنوات أتذكرونها و التي راح ضحيتها عشرات من المصريين الغلابة وبعدها لم يتغير شيئا!!!! بل أنني منذ يومين في المساء كنت في محطة القطار رايت قطار من قطارات الموت يدخل المحطة و لم أكن اتخيل ان به أحد فقد كان مظلما تماما و لكنني رأيت رؤسا تحاول الخروج من نوافذ القطار لأن الأبواب كانت غير قابلة للفتح و لم يقف القطار بل أكمل السير و الناس تحاول التدافع من النوافذ المحطمه.
!!!!
مصر هو في حد يا بلدي بيحبك بجد؟

ياللي كنتم رافعين علم مصر و هتفتوا بنحب مصر
مصر مش كورة و بس
مصر أرض و ناس بتحس
لو كنت صحيح بتحب مصر
راعي ضميرك الأول بس
و يسقط يسقط صحاب القصر

4 comments:

AmReloo said...

رغم انى مختلف معاكى فى حاجات كتير بس بجد انا متفق معاكى فى النقطه دى بالذات...
و بالرغم انى فرحت بفوز مصر بكاس الامم لكن كان جوايا حاسس ان احنا معندناش دم عشان الناس اللى ماتت دى و اهالى الناس اللى ماتوه دول لما يكون بيتألمو و يشوفو الناس ماشيه بترقص فى الشوارع عشان كسبنا فى ماتش كره لأ و كمان اتصرف للعيبه من خرينه الدوله 3 مليون جنيه مكافأت...طب مين محتاج اكتر ال 3 ملايين دول ؟الضحايا ولا اللعيبه...كنا لازم نفرح بفوز المنتخب لأن الكره دلوقتى ليها ابعاد كتير على المستوى الاقليمى و العالمى و معنى اننا نفوز ببطوله قاريه و كبيره زى دى يبقى دى حاجه تشرفنا...بس مكنش وقتوه خالص اننا نعبر عن فرحتنا...
صحيح انا شفت اعلان فى جريده الجمهوريه النهارده ان شركه السلام هتصرف 150 الف جنيه لأسره كل واحد متوفى و 15الف لكل مصاب و 50 الف لكل عربيه اتحرقت...طب ده اللى ماتو بتاع 1000 ...تفتكرى فعلا هيدفعو لكل اسره 150 الف...تفتكري يعنى هيدفعو 150 مليون ؟؟؟ولا ده مجرد كلام...اكيد ده مجرد كلام...ربنا يهدينا و ينور طريقنا بالحق ديما...

الست نعامة said...

يبقى أنت أكيد...أكدي في مصر.

Mo Eltaher said...

شباب حزب الغد لما ييجوا يتريقوا على بابا حسنى بيقولوا احاجه جميله اوى عجبتنى :

يسقط يسقط فوزى مبارك
او
يسقط يسقط حمدى مبارك

عجبنى التريقه على اى شيىء يمت مبارك بصله

الناس جلها شيزوفرنيا من مبارك
كان تعبان فى ماتش النهائى
ادعو معايا ربنا يريحه

Eve said...

ناس يأكلون الحصرم، وناس يضرسون. مهما حدث، دائماً تأتي على رأس الإنسان المسكين.